تحدي ال29 يوم – اليوم العاشر

يابة شلونكم جميعا ان شاء الله تكونون بخير وصحة...

 

وصلنا اليوم العاشر من التحدي وهذي من افضل الايام بحياتي خلتني التزم واتعلم شغلات جديدة,شاركت حتى اقوي واطور انكليزيتي وايضا امارس رياضتي المفضلة الي هي الركض,يوميا عندي 5 ساعات اسمع واتعلم واقرا واحجي اللغة الانكليزية,وايضا اركض 5 كيلومتر اقل شي,

هدفي جان الاستمرار يوميا حتى اطور انكليزيتي, وايضا اركض 10 كيلومتر خلال هذا التحدي.

اما التقدم الي حققته بال10 ايام الراحت كالاتي:

-سمعي صار اقوى للانكليزي وايضا حاجز الخوف والارتباك تخلصت من عنده وايضا داحاول احجي وافكر باللغة, تابعت لحد هسه من التحدي 36 حلقة من مسلسلي الامريكي المفضل بدون ترجمه (3 حلقات يوميا),وايضا داسمعpodcast واني داركض,ومننسى حفظت اغنيتي المفضلة.

-استخدمت تطبيقCinamana حتى اتابع مسلسلي المفضل,وكتاب قصص قصيرة اسمهNew-Yorkers,ومرايتي الجميلة,وتطبيقPodcast,وخالو يوتيوب حتى اخذ جمل صعبة النطق وامرن لساني عليها,وايضا تطبيقFlyrun حتى يحسبلي تقدمي بالركض.

-دالاحظ تقدمي باللغة الانكليزية ودياخذني الواهس 5 ساعات ومرات اكثر عكس قبل التحدي مجنت التزم بهجي وقت,وبلشت اركض 5 كيلومتر وبعدها 7 كيلومتر وجان من المتفرض انو خلال ال29 يوم مالت التحدي اركض 10 كيلو متر بس المفاجأة!! اني حققت هالشي باليوم العاشر بسبب حماسي وشغفي وهذا اعتبره انجاز عظيم,صارت عندي تشنجات هواي بسبب انقطاعي لاكثر من 8 اشهرعن الركض,كلش فخور بهذي ال10 ايام لان حققت تقدم عظيم ورح استمر بي,وهذي صورة توثق تقدمي:

-دابذل جهد عظيم حتى اوصل لهدفي من هذا التحدي انو اكون طورت انكليزيتي وركضت 10 كيلومتر.

-تفاجأت لما عرضت ع اصدقائي يشاركوني هذا التحدي ونركض سويا 10 كيلومتر جانو كلش متحمسين رغم انو همه ممشاركين.

-هدفي ببداية التحدي انو استمر 3 ساعات يوميا بتعلم الانكليزية واحفظ اغنيتي الانكليزية المفضلة,وانو اركض 10 كيلومتر خلال هذا التحدي,والان اني مستمر 5 ساعات يوميا بكل حب بدون ملل وحفظت اغنيتي خلال 10 ايام فقط,وركضت ال10 كيلومتر خلال 10 ايام فقط,والتحدي الجديد الي ضفته انو رح اركض 10 كيلومتر بساعة وحدة او أقل.

بالختام اني ممتتن لهواية اشياء بهذا التحدي:

1-للصحة والقابلية على التعلم وهذي نعمة عظيمة

2-للاصدقاء الي شاركوني بتحدي الركض والاشخاص الي يبتسمون لمن يشوفونا نركض وبلشو يطلعون يركضون ويانه

3-والتقدم والحماس والشغف والتفاؤل الي صار عندي واستمر