تحدي ال29 يوم - مدونة الوداع

 يابة شلونكم ان شاء الله تكونون بخير وصحة . . .

اني "احمد عامر" , عمري 21 سنة , شاركت بتحدي ال29 يوم حتى اطور انكليزيتي وأحفظ اغنيتي الانكليزية المفضلة , واركض 10 كيلو متر خلال ساعة وحدة فقط , ولاتستغرب ياضلعي من كل ذولي الشغلات لان شي مرتبط بشي ثاني(اني داتعلم انكليزي واسمع,  وامارس اللغة ويا المراية , ولمن اركض اسمع اغنيتي واردد بوراها) هذا الشي كلش مهم جان بالنسبة الي .

تعال ضلعي وياي حتى اعرفك عن "تحدي ال29 يوم" هذا التحدي اطلقة الضلع "مرتضى التميمي" بيوم ميلادة(بميلادة سوا تحدي لعد اذا يتزوج شيسوي؟) داشاقة وياك😅 , حتى نتعلم فد شغلة ونطور نفسنا بيها ونستمر بتعلمها خلال 29 يوم فقط , التحدي عبارة عن مهارة كلش مهمه حتى نتعلم اي شغلة بحياتنا بغض النظرعن الظروف وكل شي , ليش اتحدى نفسي؟ حتى اربط شغفي باستمرار وممارسة واهتمام وتركيز وما انقطع لأي سبب كان . وهذي مشكلتي ومشكلتك ومشكلة أي شخص ديحاول يتعلم ويطور من نفسه .

تعرف ليش اني مهتم وركزت بال29 يوم انو اطور انكليزيتي؟ 

لان كل الوظائف المحترمة والدورات الممتازة ع النت همه بالانكليزي, اذا تسافر لأي دولة رح تحتاج انلكيزي, والاسباب كلش كثيرة اني وانت نعرف شكد الانكليزية مهمه بحياتنا شكد رح تفتحنا فرص بحياتنا .

جربت اتعلم قبل التحدي وجربت كل الطرق والتطبيقات الي تعلم انكليزي بس! لاحظت نفسي ورا فترة داتقطع عن التعلم وديصيرعندي ملل بسبب الطرق التعليمية الي مدتناسبني , هذا الشي كلش جان يزعجني لان اني رايد اتعلم وعندي شغف بس ديصيرعندي ملل , بلشت ابحث عن المشكلة وشلون احلها وشلون اسوي خطة تعلم تناسبني حتى ابقى مستمر.

جنت قبل التحدي اكول باجر ابلش وورا شهر يلا ابلش . وابلش بصورة متقطعة وهيج اقضيها وانقطع ويصير عندي ملل . جنت افكر انو اكو فد شي ناقصني وهو الي رح يخليني استمر واتعلم واحافظ ع شغفي, 

بليلة من الليالي فتحت الانستاكرام ولاكيت مرتضى ناشر فيديو اعلن عن هذا التحدي العظيم كلت هذي فرصتي انو اشارك واتحدى نفسي لمدة 29 يوم انو اتعلم الانكليزي واتخلص من كل مشاكلي بالتعلم واهم شي استغل ال29 يوم بطريقة تعلم جديدة تناسبني ومتسوي عندي ملل , وبلشت التحدي وكلي امل واصرار انو رح اوصل لهدفي .

خطتي جانت انو اسمع مسلسلي الامريكي المفضل بكثرة وبدون ترجمه , وامارس اللغة ويا نفسي بالمراية , وايضا اسمع Podcast وكتب مسموعه واقرا قصص قصيرة , واحفظ اغنيتي الانكليزية .

وهسه انت دتقرا هذي المدونة بعد 29 يوم من بداية التحدي , تعرف شنو سويت؟

اني طورت انكليزيتي من خلال الاستماع للمسلسلات الاحبها, والاغاني, والممارسة عن طريق انو احجي ويا روحي بالمراية , واني استمريت وكدرت أحقق كمية استفادة كلش راضي عنها , وتخلصت من الملل الي يصير وياي لمن ابلش اتعلم , مو بس هجي اني حفظت اغنيتي الانكليزية المفضلة ايضا , وركضت ال10 كيلومتر خلال ساعة وحدة فقط , كل هذا التقدم خلال 29 يوم فقط !

واني كلش راضي عن التقدم الي حققته .

المصادر الي استخدمتها:

- تطبيق سينمانا لمشاهدة المسلسلات والافلام .
- تطبيق Podcast .
- كتاب للقصص القصيرة اسمة "New Yorkers" .
- تطبيق FlyRun حتى يحسبلي تقمي بالركض .

التحدي علمني اتحدى نفسي بكل مرة رايد اتعلم بيها شغلة جديدة حتى احافظ ع شغفي وتركيزي وابقى مستمر بدون ملل, 

من خلال هذا التحدي وبعد مخلص يومي صار ميكتمل بدون تعلم انكليزي.

بالنهاية اني ممتن شخصيا لمرتضى ولكل التيم الي ويا ضلعا ضلعا, وممتن ع كل دقيقة تعبتوا بيها علمودنا,

وممتن لكلمة "تحدي" لان بسببها اني تغيرت حياتي وطريقة تفكيري تماما,

وممتن لكل ضلع شارك بالتحدي واستمر, كل ضلع شارك هو فاز بالتعلم وتطوير ذاته,

ختاما حاب اكوللكم اتحدوا انفسكم حتى تتعلمون وتنجزون وتستمرون وتبقون محافظين ع شغفكم, 

والتحدي بحد ذاته حل لكل مشكلة تواجهوها بالتعلم وبالحياة .

أحبكم 💖💖💖